الشاعر السعيد قنديل
الأب الروحي لقصر ثقافة
سيدي سالم .كفرالشيخ
إتبسمي ولاتحزنيش
1
إتبسمي ولاتحزنيش
الدنيا غابة والبشر غربان وهيش
والسكة صبحت سكتين
سكة شقا وعذاب وشوك علشان نعيش
والتانية سكة موت وتوهه ماتنتهيش
2
الروح حمامة بوح
بتهدل ع الوطن
محتاجة حبة ضني
وشوية مطر
والقلب نبضة بيبتدي
وقت الخطر
والدم نار مابتنطفيش
3
ياطول شفاها النفس
في الزمن الحرام
وعشان نروح للحلم
راح نوصل بكام
والشهدا صاروا الأن كتير
والكل مجهول المصير
والخونة بانوا في الأفيش
بقوا زي دود المش
في الجبن القريش
والخلق لسه هاموش وريش
فاتبسمي ولا تحزنيش
4
الحلم عدا من هنا
ماعرفناهوش
رحنا وجينا من هنا
مافهمنهوش
ورجعنا تاني كلنا
بنفس الوشوش
وكل وش وفيه عينين
لكن العيون مابتستحيش
والسكة صبحت سكتين
والخلق لسه هاموش وريش
فاتبسمي ولاتحزنيش
ليست هناك تعليقات:
إرسال تعليق