تخيل تبقى ماشي في وسط الصحراء فتلاقي قدامك حفرة في الأرض فتدخل فيها فتلاقي نفسك فجأة اتنقلت لمكان تاني أشبه بالأماكن الخيالية اللي في أفلام الأساطير وكأنك دخلت لفجوة زمنية نقلتك لمكان وزمان تاني. ده اللي هيحصلك لو دخلت كهف الجارة في الصحراء الغربية.
كهف الجارة واحد من عجائب مصر اللي كتير ما يعرفوش عنها حاجة، مكان أسطوري بمعنى الكلمة، من أغرب الأماكن اللي ممكن تشوفها في حياتك بسبب تكوين الكهف العجيب وشكله الغريب من جوه.
لو دخلت الكهف ده حتلاقي تكوينات جيولوجية حتبهرك أشبه بشلالات مياه متحجرة نازلة من أعلى الكهف في إبداع رباني مش حتتخيل إنه موجود إلا في قصص الأساطير.
العجيب بقى إن الرواسب اللي نازلة من فوق دي أصلًا حصلت بسبب تسريب المياه من خلال رمال الصحراء على مدار ملايين السنين وبسبب الحرارة الشديدة اتجمدت بالشكل ده عشان تعمل المكان الخيالي ده.
الكهف ده اكتشفه رحالة ألماني وكان معاه الدليل بتاعه وبعد عاصفة شديدة لقوا المكان ده قدامهم فدخلوه يحتموا فيه. فلقوا واحد من أندر كهوف العالم حتى الألمان قالو عليه إنه أجمل مكان عينك ممكن تقع عليه في قارة أفريقيا.
الكهف مكون من عدة مغارات وموجود على بعد ٥٠ متر تحت باطن الأرض وهو بين الواحات البحرية ومدينة أسيوط اللي بيبعد عنها حوالي ١٤٠ كيلو.
من الحاجات اللي اكتشفوها جوه الكهف هي بعض المنحوتات البدائية اللي بيرجع تاريخها لعصر الإنسان البدائي وده بيوحي إن الكهف ده كان ملجأ للإنسان من آلاف السنين، كفاية بس إنك تعرف إن عمر الكهف ده يعدي الاف السنين.
ليست هناك تعليقات:
إرسال تعليق